హైదరాబాద్ కంపెనీ ఫినోసో ఫార్మాతో అమెరికా సంస్థ క్రిటిటెక్ ఒప్పందం
ఫినోటెక్ ఫార్మా పేరిట జేవీ
హైదరాబాద్, బిజినెస్ బ్యూరో:
ప్రయోగాలకు అవసరమైన ఔషధాలను అతి సూక్ష్మ పార్టికల్స్(రేణువు)గా అందించేందుకు హైదరాబాద్ కంపెనీ ఫినోసో ఫార్మా సిద్ధమైంది. ఇందుకోసం అమెరికాకు చెందిన క్రిటిటెక్ అనే సంస్థతో ఒప్పందం కుదుర్చుకొంది. ఈ రెండు సంస్థలు 50:50 జాయింట్ వెంచర్(జేవీ) ‘ఫినోటెక్ ఫార్మా’ను ఏర్పాటు చేశాయి. ఈ జేవీ భారత ఫార్మాస్యూటికల్ కంపెనీలకు అవసరమైన యాక్టివ్ ఫార్మా ఇంగ్రిడియెంట్స్(ఏపీఐ) పరిమాణం కుదింపు, పార్టికల్ డిజైన్ సేవలను అందించనుంది. .....
కొన్ని మైక్రాన్‌ల నుంచి నానో మీటర్(ఒక మీటర్‌లో వంద కోట్ల వంతు) పరిమాణంలో ఔషధాలను పరిశోధనలకు అందించడం ఈ కంపెనీ ప్రత్యేకత. పరిశోధనలు, ప్రాథమిక స్థాయి క్లినికల్ ట్రయల్స్‌కు ఇవి ఉపయోగకరంగా ఉంటాయి. వివిధ థెరపెటిక్ చికిత్సలకు సంబంధించిన ఓరల్ డోసేజ్, ఇంట్రావీనస్ సస్పెన్షన్, ఇన్హలేషన్ ఉత్పత్తులను విభిన్న డెలివరీ వ్యవస్థల్లో అందించేందుకు తోడ్పడతాయి. తొలుత భారత మార్కెట్‌పైనే దృష్టిసారిస్తున్నామని, ఇప్పటికే 3 ఫార్మా సంస్థలు తమ టెక్నాలజీ వినియోగానికి సిద్ధంగా ఉన్నట్లు ఫినోసో ఫార్మా ఎండీ కె.ఆర్.కుమార్ గురువారం ఇక్కడ విలేకరులకు వెల్లడించారు.
ప్రాథమికంగా ఏటా 3 మాలిక్యూల్స్‌ను ఎంచుకొని, వాటిని ఫినిష్డ్ డోసేజ్‌లుగా అభివృద్ధి చేయడం వరకు అన్ని రకాల సేవలను తాము అందిస్తామని.. విజయవంతమైన ఉత్పత్తి రాయల్టీ (10 కోట్ల డాలర్లు)లో 10 శాతం వాటాను తీసుకొంటామని ఆయన వివరించారు. అమెరికా వెలుపల తొలిసారి ఈ టెక్నాలజీని అందిస్తున్నామని, 2-3 ఏళ్లలో ఏటా 10-12 ఉత్పత్తులను అభివృద్ధి చేయడం లక్ష్యమని క్రిటిటెక్ సీఈవో డేవిడ్ జాన్‌స్టన్ పేర్కొన్నారు. ఈ జేవీ కోసం ప్రారంభంలో 10-20 లక్షల డాలర్ల(5.5 కోట్ల నుంచి రూ.11 కోట్లు) పెట్టుబడి పెడతామన్నారు. 2009లో ఏర్పాటైన ఫినోసో ఫార్మా.. ఫార్ములేషన్ డెవలప్‌మెంట్ సేవలను అందిస్తోంది. దీనికి అమెరికా, పశ్చిమ యూరప్, ఆగ్నేయాసియా, ఆస్ట్రేలియా మార్కెట్లలో కస్టమర్లున్నారు.
