రోదసిలోకి చైనా మహిళ

అంతరిక్షంలోకి తొలిసారి మహిళా వ్యోమగామిని పంపిన చైనా

అమెరికా, రష్యాల తర్వాత మానవ సహిత డాకింగ్ చేపడుతున్న మూడో దేశంగానూ రికార్డు బీజింగ్: అంతరిక్ష రంగంలో చైనా మరో అరుదైన ఘనతను సొంతం చేసుకుంది. శనివారం సాయంత్రం తన తొలి మహిళా వ్యోమగామి లియు యాంగ్‌ను అంతరిక్షానికి పంపింది. దీంతోపాటు అమెరికా, రష్యాల తర్వాత రోదసీలో మానవ సహిత డాకింగ్ (అనుసంధానం) నిర్వహించిన మూడో దేశంగానూ చైనా రికార్డు సృష్టించనుంది. వాయవ్య చైనాలోని గోబి ఎడారిలో గల జియుక్వాన్ ఉపగ్రహ ప్రయోగ కేంద్రం నుంచి సాయంత్రం 6:37 గంటలకు షెంర-9 వ్యోమనౌక (దేవుడి బండి అని అర్థం) ద్వారా మహిళా వ్యోమగామితోపాటు మరో ఇద్దరు పురుష ఆస్ట్రోనాట్స్‌ను పంపినట్లు చైనా ప్రకటించింది. హెనాన్ ప్రావిన్స్‌లోని లింరకు చెందిన 33 ఏళ్ల లియు ఇంతకుముందు ఎయిర్ ఫోర్స్ పైలట్‌గా పనిచేశారు. గతంలో ఒకసారి తన విమానం 18 పావురాలను ఢీకొట్టిన సందర్భంలో నైపుణ్యం, ధైర్యం ప్రదర్శించిన ఆమె విమానాన్ని సురక్షితంగా ల్యాండ్ చేశారు. పలు అత్యవసర సందర్భాల్లోనూ చాకచక్యంగా వ్యవహరించి వీరోచిత పైలట్‌గా పేరు పొందారు. చైనా తొలి మహిళా ఆస్ట్రోనాట్ కావడంతోపాటు అంతరిక్షంలోకి వెళ్లిన 57వ స్త్రీగా లియు రికార్డు సృష్టించారు. ఈమెతోపాటు పురుష వ్యోమగాములు జింగ్ హైపెంగ్, లియు వాంగ్‌లు షెంర-9లో అంతరిక్షానికి వెళ్లారు. రోదసీలో శాశ్వత స్థావరం ఏర్పర్చుకునేందుకుగాను అమెరికా, రష్యాల తర్వాత సొంత అంతరిక్ష కేంద్రం (తియాంగాంగ్-1)ను ఏర్పాటు చేసుకుంటున్న మూడో దేశంగా చైనా అవతరించింది. తియాంగాంగ్-1ను 2020 కల్లా పూర్తిస్థాయిలో నిర్మించేందుకు చైనా ప్రయత్నిస్తోంది. భూమికి 343 కిలోమీటర్ల ఎత్తులో కక్ష్యలో తిరుగుతున్న తియాంగాంగ్-1(దీనికి స్వర్గలోకపు భవనం అని అర్థం)కు ఆ దేశం మానవ సహిత డాకింగ్‌ను నిర్వహించడం ఇదే తొలిసారి. అదేవిధంగా ఈ ప్రయోగం కోసం చైనా ఉపయోగించిన రాకెట్ ఆ దేశం ఇంతవరకు రూపొందించిన రాకెట్లలోకెల్లా పొడవైనది, బరువైనది కావడం విశేషం. షెంర-9ను తియాంగాంగ్-1కు అనుసంధానం చేయడంతోపాటు ఈ ముగ్గురూ వ్యోమనౌక నుంచి బయటికి వచ్చి తియాంగాంగ్‌లోకి వెళతారు. దాదాపు పది రోజులపాటు అందులో ఉండి వివిధ పనులు పూర్తిచేసి, తిరిగి భూమికి చేరుకుంటారు.

మూడున్నరేళ్లకూతురిపై అత్యాచారం

బెంగళూరులో ఫ్రెంచ్ దౌత్యాధికారి దురాగతం

అతన్ని వదలరాదని కేంద్రానికి భార్య వినతి బెంగళూరు, న్యూస్‌లైన్: బెంగళూరులోని ఫ్రాన్స్ రాయబార కార్యాలయంలో దౌత్యాధికారిగా పనిచేస్తున్న పాస్కల్ మజూరియర్ అనే ఫ్రెంచ్ జాతీయుడు కన్న కూతురిపైనే అఘాయిత్యానికి ఒడిగట్టాడు. ముక్కుపచ్చలారని మూడున్నరేళ్ల కూతురిపై గతకొంతకాలంగా అత్యాచారం సాగిస్తున్నాడు. ఆలస్యంగా వెలుగుచూసిన ఈ ఘటనపై నిందితుడి భార్య సుజా జోన్స్ మజూరియర్ ఫిర్యాదు మేరకు ఇక్కడి హైగ్రౌండ్స్ పోలీస్‌స్టేషన్ అధికారులు శుక్రవారం పాస్కల్‌ను అదుపులోకి తీసుకుని, బౌరింగ్ ఆస్పత్రిలో వైద్య పరీక్షలు చేయించారు. పాపకు పరీక్షలు నిర్వహించిన బాప్టిస్ట్ ఆస్పత్రి వర్గాలు కూడా పాస్కల్‌పై మెడికో-లీగల్ కేసును నమోదు చేశాయి. వైద్య పరీక్షల్లో అత్యాచారం జరిగినట్లు నిర్ధారణ అయింది. నిమ్హాన్స్ వైద్యులు కూడా బిడ్డపై అత్యాచారం, దౌర్జన్యం జరిగిందని తేల్చారు. అయితే దౌత్య ఒత్తిళ్ల కారణంగా అతన్ని తిరిగి విడిచిపెట్టారు. కానీ సుజా మాత్రం ఈ వ్యవహారంలో తన భర్తను దౌత్య సంబంధాల పేరిట విచారణ నుంచి మినహాయించవద్దని కేంద్రాన్ని కోరారు. ఈ మేరకు హోంమంత్రి చిదంబరం, విదేశాంగ మంత్రి ఎస్‌ఎం. కృష్ణకు శనివారం లేఖ రాశారు. కేసుకు సంబంధించి చట్టబద్ధ లాంఛనాలు పూర్తయ్యే వరకు ఆయన దేశం విడిచి వెళ్లకుండా చూడాలని కోరారు. తమ పిల్లలు ఫ్రెంచ్ జాతీయులైనప్పటికీ, వారిని ఆయనకు అప్పగించరాదన్నారు. సుజా తరఫున లేఖలు రాసిన ఆమె న్యాయవాది బసు, తన క్లయింట్‌కు, ఆమె పిల్లలకు రక్షణ కల్పించాలని విజ్ఞప్తి చేశారు. కేరళకు చెందిన సుజా ఇక్కడి వసంత నగరలోని ఫ్రాన్స్ రాయబార కార్యాల యంలో డిప్యూటీ హెడ్‌గా పని చేస్తున్న మజూరి యర్ (39)ను 2001లో ఫ్రాన్స్‌లో పెళ్లి చేసుకున్నారు. వారికి 2005లో బాబు పుట్టగా, 2008లో పాప , 2010లో మరో బాబు పుట్టారు.

మీరు తగ్గిస్తే.. మేమూ తగ్గిస్తాం--- పెట్రోలు పన్నులపై రాష్ట్రాలకు ప్రణబ్ సూచన

ముంబై: వినియోగదారులపై భారం తగ్గించేందుకు రాష్ట్రాలు పెట్రోలుపై పన్నులు తగ్గిస్తే.. కేంద్ర ప్రభుత్వం కూడా తాత్కాలికంగా సుంకాలను తగ్గించేం దుకు సుముఖంగా ఉందని ఆర్థికమంత్రి ప్రణబ్ ము ఖర్జీ వ్యాఖ్యానించారు. శనివారం అసోచామ్ నిర్వహించిన ఓ సదస్సులో ప్రణబ్ మాట్లాడారు. ‘‘నేను ఇప్పటికే ముఖ్యమంత్రులను కోరాను. బ్యారెల్ ముడి చమురు ధర 90 డాలర్ల దాకా తగ్గే వరకు పన్నులు తగ్గించాలని సూచించా. రాష్ట్రాలు పన్నులు తగ్గిస్తే మేం కూడా సుంకాలు తగ్గిస్తాం’’ అని ఆయన పేర్కొన్నారు. పెట్రోలు ధరలో సగం వరకు కేంద్రం, రాష్ట్రాలు విధించే పన్నులు ఉంటున్న సంగతిని ప్రణబ్ ఈ సందర్భంగా గుర్తుచేశారు. ‘‘పెట్రోలుపై పన్నుల రూపేణా కేంద్ర, రాష్ట్రాలకు రాబడి బాగానే వస్తున్నా.. క్లిష్ట సమయాల్లో భాగస్వామ్యపక్షాలన్నీ కష్టాలను పంచుకోవాల్సిన అవసరం ఉంది. ఈ కష్టాలను ఏ ఒక్క భాగస్వామిపైనో నెట్టివేయలేం’’ అని చెప్పారు. కిందటి నెలలో ఆయిల్ కంపెనీలు లీటరు పెట్రోలుపై ఏకంగా రూ.7.54 పెంచిన సంగతి తెలిసిందే. అయితే ఈ నెల 3న రూ.2 తగ్గించి కాస్త ఊరట కల్పించాయి. జూన్ 14 నాటికి బ్యారెల్ ముడి చమురు ధర 95.97 డాలర్లకు పడిపోయినందున ధరలు మరింత తగ్గే అవకాశాలు కనిపిస్తున్నాయి.

సీబీఐ ఎదుట యడ్యూరప్ప తనయులు

బెంగళూరు, న్యూస్‌లైన్: కర్ణాటక మాజీ ముఖ్యమంత్రి యడ్యూరప్ప తనయులు విజయేంద్ర, రాఘవేంద్ర, అల్లుడు సోహన్ కుమార్‌లు శనివారం సీబీఐ ఎదుట హాజరయ్యారు. సుప్రీం కోర్టు ఆదేశాల మేరకు అక్రమ మైనింగ్ కేసును విచారిస్తున్న సీబీఐ, వీరిని విడివిడిగా మూడు గంటలపాటు ప్రశ్నించింది. సీబీఐ అధికారులు ఈ ముగ్గురికీ వేరువేరు సమయాలను కేటాయించారు. దీంతో వారు విడివిడిగా వారికి కేటాయించిన సమయాల్లో స్థానిక గంగానగరలోని సీబీఐ కార్యాలయానికి వచ్చారు. అయితే, విచారణ అనంతరం ముగ్గురూ కలిసే వెళ్లారు. వీరు నిర్వహిస్తున్న ‘ప్రేరణ’ ట్రస్టుకు ఓ మైనింగ్ కంపెనీ నుంచి రూ.20 కోట్ల విరాళాలు అందడంపై సీబీఐ వీరిని ప్రశ్నించింది

బర్త్ సర్టిఫికెట్ కోసం రూ.100 లంచం -డీడీ ద్వారా మునిసిపల్ కమిషనర్‌కు పంపిన ఆడిటర్

విరుదునగర్ (తమిళనాడు): అవినీతికి వ్యతిరేకంగా బీహార్‌కు చెందిన ఓ రైతు ఇటీవల భిక్షాటన చేసి సీఎం నితీష్‌కుమార్‌కు డబ్బు పంపిన తరహాలోనే తమిళనాడులో ఓ ఆడిటర్ వినూత్నంగా నిరసన తెలిపారు. జనన ధ్రువపత్రం జారీలో జాప్యాన్ని నిరసిస్తూ లంచంగా స్వీకరించాలంటూ రూ.100 డి.డి.ని మునిసిపల్ అధికారులకు పంపాడు. దీంతో కంగుతున్న అధికార యంత్రాంగం ఆగమేఘాలపై కదిలి అతడి ఇంటి ముందు వాలింది. దరఖాస్తుదారుడి నివాసానికే వచ్చి అడిగిన పత్రాన్ని అందచేశారు. విరుదునగర్‌కు చెందిన పళనిసామి వృత్తిరీత్యా ఆడిటర్. ఓ బహుళజాతి కంపెనీలో ఉద్యోగానికి ఎంపికైన తన కుమారుడి జన్మదిన పత్రాన్ని ఇవ్వాలని కోరుతూ మే 15న ఆయన దరఖాస్తు చేసుకున్నారు. రుసుము చెల్లించి పక్షం రోజులు గడిచిపోతున్నా స్పందన లేకపోవటంతో విసిగిపోయారు. అవినీతిలో కూరుకుపోయిన మునిసిపాలిటీ అధికారులు పనులు చేయాలంటే లంచం చెల్లించక తప్పదంటూ స్థానికంగా ఓ పార్టీ రూపొందించిన పోస్టర్లు చూడటంతో ఏం చేయాలో ఆయనకు బోధపడింది. అంతే... బ్యాంకులో రూ.100 డీడీ తీసుకుని లంచం కింద స్వీకరించాలని కోరుతూ మునిసిపల్ కమిషనర్‌కు లేఖ రాశారు. ఈ కాపీని జిల్లా కలెక్టర్‌కు కూడా పంపారు. దీంతో కదిలిన మునిసిపల్ అధికారులు శుక్రవారం ఆయనకు ఇంటివద్దే జనన ధ్రువపత్రాన్ని అందజేశారు.

9 మంది సాఫ్టువేర్ ఉద్యోగుల దుర్మరణం - అంతా టీసీఎస్ సిబ్బందే

వారితోపాటు వెళ్లి దుర్మరణం పాలైన ఓ ఉద్యోగిని చెల్లెలు హైదరాబాద్, న్యూస్‌లైన్: ఒకరు కాదు, ఇద్దరు కాదు. మొత్తం 14 మంది. వారంతా ఒకే కాలేజీలో చదువుకున్నారు. సాఫ్ట్‌వేర్ ఉద్యోగులుగా శిక్షణ పూర్తి చేసుకున్నారు. ఉద్యోగాల్లో చేరేముందు దైవ దర్శనం చేసుకోవాలని బయల్దేరి, తిరిగిరాని లోకాలకే చేరుకున్నారు. షిర్డీ బస్సు ప్రమాదంలో హైదరాబాద్ గౌలిదొడ్డిలోని టాటా కన్సల్టెన్సీ సర్వీసెస్‌కు చెందిన తొమ్మిది మంది ఉద్యోగులు మరణించారు. దివ్య అనే ఉద్యోగినితో పాటు బయల్దేరిన కవల సోదరి దీప్తి కూడా దుర్మరణం పాలైంది. మృతుల్లో ఎనిమిది మంది మహిళలే! కాగా మరో ఇద్దరు తీవ్ర గాయాలపాలయ్యారు. మరొకరి జాడ తెలియరావడం లేదు. బి.నరేశ్, ఉషాకీర్తి, కె.సావర్ణిక, ఎస్.ఉమామహేశ్వరి, శేఖర్, మానస, కృష్ణ సాహిత్య, సుచిత్ర, దివ్యపాండ, ఆమె సోదరి దీప్తి దుర్మరణం పాలయ్యారు. వి.సంపత్, రాయప్రోలు సత్యమంగళ పూజిత, కిరణ్‌కుమార్ తీవ్రంగా గాయపడ్డారని మాదాపూర్ పోలీసులు తెలిపారు. వీరితో పాటు మహిమ, శిరీష అనే మరో ఇద్దరు ఉద్యోగులు కూడా ప్రమాదానికి గురైనట్టు తెలుస్తోంది. ఈ 14 మందీ విజయనగరం జిల్లా చింతలవలస మహారాజా ఇంజనీరింగ్ కాలేజీలో చదివారు.గౌలిదొడ్డిలోని క్యూసిటీలో ఉన్న టీసీఎస్‌లో మార్చి 5న చేరారు. మే 29న శిక్షణ పూర్తి చేసుకున్నారు. షిర్డీ వెళ్లేందుకు వీరందరికీ సంపత్ టికెట్లు బుక్ చేశాడు. అంతా మాదాపూర్‌లో బస్సెక్కారు. దుర్ఘటన గురించి తెలియగానే వారి సహోద్యోగులంతా తల్లడిల్లిపోయారు. తల్లిదండ్రులు శోకసంద్రంలో మునిగిపో యారు. మృతుల్లో మానసది విజయనగరానికి చెందిన కొట్టన. పి.దివ్య, దీప్తిలది వైజాగ్ భానూ స్ట్రీట్స్ దాబా గార్డెన్స్. ఎస్.ఉమామహేశ్వరిది వైజాగ్‌లోని వెంకటేశ్వరమెట్ట అల్లిపురం. కె.సావర్ణికది వైజాగ్‌లోని నౌరోజీ రోడ్డు ఎంఆర్‌పేట్. ఇల్ల కృష్ణ సాహిత్యది విజయనగరం. సత్యమంగళది వైజాగ్ బండపాలెం చిన్న రుషికొండ. వీరంతా గౌలిదొడ్డి ఆమని లగ్జరీ లేడీస్ హాస్టల్లో నివాసముంటున్నారు. ప్రమాదం గురించి తెలిసి వారి రూమ్మేట్ మామిడి తేజారాణి కన్నీటి పర్యంతమయ్యారు. తాము ఎనిమిది మందిమి హాస్టల్లో ఉంటున్నట్టు చెప్పారు. ప్రసన్న అనే అమ్మాయి శుక్రవారమే ఊరికి వెళ్లగా మిగతా ఆరుగురు షిర్డీ బయల్దేరారన్నారు. తమ సంస్థకు చెందిన పలువురు ఉద్యోగులు షిర్డీ బస్సు ప్రమాదంలో మరణించడంతో టీసీఎస్‌లో విషాదం నెలకొంది. మరణించిన తమ ఉద్యోగులకు టీసీఎస్ నివాళులు అర్పించింది. వారి కుటుంబాలకు ప్రగాఢ సానుభూతిని తెలియజేసింది. షోలాపూర్ ఆస్పత్రిలో చికిత్స పొందుతున్న తమ ఉద్యోగులకుఅక్కడి టీసీఎస్ బృందం అన్ని విధాలుగా సహకారం అందిస్తోందని టీసీఎస్ ఉన్నతాధికారి ఒకరు ‘సాక్షి’కి తెలిపారు.

రాంబాబు లైన్లోకొచ్చాడు

‘నువ్వు నందా అయితే నేను బద్రీ బద్రీనాథ్... అయితే ఏంటి?’... పన్నెండేళ్ల క్రితం ఈ డైలాగ్ సృష్టించిన సంచలనం అంతా ఇంతా కాదు. పసి పిల్లల దగ్గర్నుంచి ప్రతి ఒక్కరినోటా ఇదే డైలాగ్. తొలి కలయికతోనే సెన్సేషన్ సృష్టించారు పవన్‌కళ్యాణ్-పూరి జగన్నాథ్. ‘బద్రి’ తర్వాత వాళ్లిద్దరూ మళ్లీ కలిసి సినిమా చేయలేదు. మళ్లీ ఇన్నాళ్లకు వాళ్లిద్దరి కాంబినేషన్‌లో వస్తున్న చిత్రం ‘కెమెరామేన్ గంగతో రాంబాబు’. డీవీవీ దానయ్య ఈ చిత్రాన్ని నిర్మిస్తున్నారు. శుక్రవారం ఈ చిత్రం రెగ్యులర్ షూటింగ్ మొదలైంది. ఈ విషయాన్ని పూరి జగన్నాథ్ ట్విట్టర్ ద్వారా తెలియజేశారు. ‘‘‘కెమెరామేన్ గంగతో రాంబాబు’ షూటింగ్ శుక్రవారం మొదలైంది. పవన్‌కళ్యాణ్ మంచి మూడ్‌లో షూటింగ్‌లో పాల్గొన్నారు. ఇందులో విలన్‌గా నా డార్లింగ్ ప్రకాష్‌రాజ్ నటిస్తున్నారు’’ అని ఆయన ట్విట్టర్లో పేర్కొన్నారు. ‘గబ్బర్‌సింగ్’ లాంటి ఇండస్ట్రీ హిట్ తర్వాత పవన్‌కళ్యాణ్ నటిస్తున్న సినిమా ఇదే. పైగా సుదీర్ఘ విరామం తర్వాత పవన్-పూరీ కాంబినేషన్‌లో రూపొందుతోన్న చిత్రం కావడంతో ఈ సినిమాపై అంచనాలు అంబరాన్ని తాకాయి. ఇందులో పవర్‌స్టార్ జర్నలిస్ట్‌గా నటిస్తున్నారు. నేటి రాజకీయాలపై ఓ వ్యంగాస్త్రంగా ఈ చిత్రాన్ని పూరీ రూపొందిస్తున్నట్లు సమాచారం. తమన్నా ఇందులో కథానాయికగా నటిస్తున్నారు. పవన్‌కళ్యాణ్-తమన్నా కలిసి నటిస్తున్న తొలి సినిమా కూడా ఇదే. అక్టోబర్ 18న గ్రాండ్‌గా ఈ చిత్రాన్ని విడుదల చేయనున్నట్లు తెలిసింది.

మృత్యుంజయుడీ బాలుడు

మహారాష్ట్రలో జరిగిన ఘోర రోడ్డు ప్రమాదం బారి నుంచి ఓ 11 నెలల బాలుడు అద్భుత రీతిలో చిన్న గాయం కూడా లేకుండా బయట పడ్డాడు! కానీ అతని తండ్రితో పాటు అమ్మమ్మ, నాన్నమ్మ, ఇద్దరు తాతయ్యలు మృత్యువాత పడ్డారు. తల్లి ఆస్పత్రిలో కోలుకుంటోంది. గుంటూరు జిల్లా వెల్దుర్తి మండలం బోదిలవీడుకు చెందిన గుండపునేని మోహన్‌రావు (30) రహేజా ఐటీ పార్క్‌లో సాఫ్ట్‌వేర్ ఇంజనీర్‌గా చేస్తున్నారు. కుత్బుల్లాపూర్ మండలం బాచుపల్లి శ్రీనివాస టవర్స్‌లో ఉంటున్నారు. 11 నెలల కొడుకు జయవర్ధన్ తలనీలాల కోసం భార్య దీపిక, తల్లిదండ్రులు ఆదెమ్మ (50), వెంకటేశ్వర్లు (54); అత్తమామలు సావిత్రి (46), కిష్టయ్య (50), మరదలు రాధికలతో కలిసి మోహన్ షిర్డీ బయల్దేరారు. ప్రమాదంలో ఆయనతో పాటు తల్లిదండ్రులు, అత్తమామలు కూడా అక్కడికక్కడే దుర్మరణం పాలయ్యారు. భార్య, మరదలు షోలాపూర్ ఆసుపత్రిలో చికిత్స పొందుతున్నారు. బాబును జాల్‌కోట్ ఆస్పత్రికి తరలించిన పోలీసులు, మధ్యాహ్నం అక్కడికి చేరుకున్న బంధువు విజయ్‌కుమార్‌కు అప్పగించారు. మోహన్ తండ్రి గుండపునేని వెంకటేశ్వర్లు బోదలవీడు సర్పంచ్‌గా పని చేశారు. ఆయన ప్రస్తుతం వైఎస్సార్ కాంగ్రెస్ పార్టీలో క్రియాశీలకంగా పని చేస్తున్నారు. వియ్యంకుడు కిష్టయ్యది దాచేపల్లి. ప్రమాద సమాచారం తెలియగానే ఎమ్మెల్యే పిన్నెల్లి రామకృష్ణారెడ్డి హైదరాబాద్‌లోని ఉస్మానియా ఆస్పత్రికి వెళ్లి వెంకటేశ్వర్లు, కుటుంబీకుల మృతదేహాలను సందర్శించి నివాళులర్పించారు. ఆంధ్ర, మహారాష్ట్ర ప్రభుత్వాలు తక్షణం మృతుల కుటుంబాలకు పరిహారం అందించాలని ఆయన డిమాండ్ చేశారు.

29 మంది రాష్ట్రవాసుల దుర్మరణం - ఆంధ్రప్రదేశ్‌కు చెందిన ప్రైవేట్ బస్సు బోల్తా..

ఉస్మానాబాద్ జిల్లాలో వంతెనపై నుంచి లోయలో పడ్డ బస్సు హైదరాబాద్ నుంచి షిర్డీ వెళ్తుండగా తెల్లవారుజామున ఘోరం... అతివేగం, ఇరుకు వంతెనే కారణమని ప్రమాద బాధితుల ఆగ్రహం అక్కడికక్కడే 27 మంది.. ఆస్పత్రికి తరలిస్తుండగా మరో ఇద్దరి మృతి మృతుల్లో 15 మంది మహిళలు, 14 మంది పురుషులు. మరో 16 మందికి గాయాలు.. పలువురి పరిస్థితి విషమం.. మృతులు విజయనగరం, విశాఖ, హైదరాబాద్, మెదక్ వాసులు షోలాపూర్/జహీరాబాద్ టౌన్ (మెదక్), న్యూస్‌లైన్: తెల్లవారుజాము సమయం. చిమ్మచీకటిని చీలుస్తూ దూసుకెళ్తున్న బస్సు. సుమారు 50 మంది దాకా ప్రయాణికులు. అంతా గాఢనిద్రలో ఉన్నారు. అంతా సవ్యంగా సాగితే మరికొద్ది గంటల్లో షిర్డీ సాయిని దర్శించుకోవాల్సి ఉంది! కానీ, జరగరాని ఘోరం జరిగింది. అతివేగంతో బస్సు అదుపు తప్పింది. ఎదురుగా ఉన్న ఇరుకు వంతెన ప్రాణాంతకంగా మారింది. బస్సు ఒక్కసారిగా వంతెనపై నుంచి 25 అడుగుల లోతున్న లోయలోకి పడిపోయింది. అంతే.. గాఢనిద్రలో ఉన్న వారిలో ఏకంగా 27 మంది అక్కడికక్కడే శాశ్వత నిద్రలోకి జారుకున్నారు. ఆస్పత్రులకు తరలిస్తుండగా మరో ఇద్దరు తుది శ్వాస విడిచారు. మహారాష్ట్రలో ఉస్మానాబాద్ జిల్లా తుల్జాపూర్ తాలూకాలోని నల్‌దుర్గ్ సమీపంలో శుక్రవారం అర్ధరాత్రి దాటాక సుమారు 2.40 ప్రాంతంలో జరిగిన ఈ అత్యంత ఘోరమైన రోడ్డు ప్రమాదం ఆంధ్రప్రదేశ్‌కు చెందిన 29 మందిని పొట్టన పెట్టుకుంది. మృతుల్లో 15 మంది మహిళలు కాగా, 14 మంది పురుషులు. మరో 16 మందికి పైగా గాయపడ్డారు. వీరిలో పలువురి పరిస్థితి అత్యంత విషమంగా ఉండటంతో మృతుల సంఖ్య మరింత పెరిగే ఆస్కారముంది. వీరంతా షోలాపూర్, ఉస్మానాబాద్ ఆస్పత్రుల్లో చికిత్స పొందుతున్నారు. క్షతగాత్రుల్లో డ్రైవర్లు కూడా ఉన్నారు. 29 మృతదేహాలను ఉస్మానియా మార్చురీకి తరలించినట్టు రవాణా మంత్రి బొత్స సత్యనారాయణ వెల్లడించారు. ఛత్తీస్‌గఢ్‌కు చెందిన రెండు, వైజాగ్‌కు చెందిన ఐదు మృతదేహాలను ఆదివారం ఉదయం విమానం ద్వారా తరలిస్తామన్నారు. దుర్ఘటనపై ఆదివారం విచారణ జరిపిస్తామని చెప్పారు. బాధితులంతా షిర్డీ సాయిబాబాను దర్శించుకునేందుకు హైదరాబాద్ నుంచి శ్రీ కాళేశ్వరి ట్రావెల్స్ బస్సులో శుక్రవారం రాత్రి బయల్దేరారు. తొమ్మిదో నంబర్ జాతీయ రహదారిపై షోలాపూర్‌కు సుమారు 70 కిలోమీటర్ల దూరంలో జల్‌కోట్ గ్రామ సమీపంలో శుక్రవారం తెల్లవారుజామున (తెల్లవారితే శనివారం) బస్సు ప్రమాదానికి గురైంది. ఓ మలుపు, ఆ వెంటనే ఇరుకైన వంతెన ఎదురవడంతో మితిమీరిన వేగం కారణంగా మలుపు తిరగ్గానే డ్రైవర్ అదుపు కోల్పోయాడు. దాంతో బస్సు దాదాపుగా 25 అడుగుల లోతున్న లోయలో పడిపోయింది. పడీ పడగానే ఆ ధాటికి రెండు మూడు పల్టీలు కొట్టిందని ఉస్మానాబాద్ ఏఎస్పీ రవీంద్రసింగ్ పరదేశి తెలిపారు. దాని ఎడమ భాగం పూర్తిగా దెబ్బతింది. లోయలో సుమారు 3 అడుగుల మేర నీరుండటం కూడా భారీ ప్రాణ నష్టానికి కారణమైందని పోలీసులు వెల్లడించారు. క్షతగాత్రుల రోదనలు, ఆత్మీయులను కోల్పోయిన వారి ఆర్తనాదాలతో చిమ్మచీకట్లో ఆ ప్రాంతమంతా దద్దరిల్లిపోయింది. ఎటు చూసినా హాహాకారాలతో చాలాసేపటిదాకా పరిస్థితి హృదయ విదారకంగా కొనసాగింది. చివరికి ప్రమాదం నుంచి బయటపడ్డ వారే ఓ ప్రైవేటు ట్రావెల్స్ సిబ్బంది సాయంతో నాలుగు కిలోమీటర్ల దూరంలోని నల్‌దుర్గ్ పోలీసుస్టేషన్‌కు సమాచారం అందించారు. పోలీసులు, స్థానికులు వచ్చేదాకా బాధితులంతా నరకయాతన పడ్డారు. బస్సు కిటికీలను కట్టర్లతో కోసి క్షతగాత్రులను బయటికి తీశారు. 18 మంది క్షతగాత్రులను 70 కిలోమీటర్ల దూరంలోని షోలాపూర్‌లో ఓ ప్రైవేటు ఆసుపత్రికి తరలించారు. అనంతరం మెరుగైన చికిత్స కోసం షోలాపూర్ సివిల్ ఆసుపత్రిలో చేర్చారు. మిగతా వారిని ఉస్మానాబాద్ ఆసుపత్రికి పంపించారు. మృతులంతా 25 నుంచి 40 ఏళ్ల లోపు వారేనని తెలిసింది. మృతదేహాలన్నీ ఘటనా స్థలిలో చెల్లాచెదురుగా పడిపోయాయి. వాటిని స్థానికుల సాయంతో జల్‌కోట్ ప్రాథమిక ఆరోగ్య కేంద్రానికి తరలించారు. ఆసుపత్రి ఇరుకుగా ఉండటంతో ఆరు బయటే టెంట్లు వేసి పోస్టుమార్టం నిర్వహించారు. అనంతరం మృతదేహాలను ఆరు అంబులెన్సుల్లో దశల వారీగా హైదరాబాద్ ఉస్మానియా జనరల్ ఆసుపత్రికి తరలించారు. ఒక్కో అంబులెన్సు వెంట ఇద్దరు పోలీసులు, ఇద్దరు పారామెడికల్ సిబ్బందిని పంపించారు. షోలాపూర్ ప్రభుత్వ ఆసుపత్రిలోని రెండు శవాల్లో ఒకదాన్ని బంధువులకు అప్పగించగా, మరో శవాన్ని అంబులెన్సులో హైదరాబాద్‌కు తరలించారు. మృతులను సెల్‌ఫోన్లు, పర్సుల్లో దొరికిన నంబర్లు, ఐడీ కార్డుల ఆధారంగా గుర్తించారు. మరికొందరిని ఆసుపత్రికి చేరుకున్న బంధువులు గుర్తించారు. చికిత్స పొందుతున్న 16 మందిలో ఇద్దరి పరిస్థితి విషమంగా ఉంది. ప్రవీణ్ అనే వ్యక్తి తలకు బలమైన గాయాలు కాగా, ఉపేంద్రకు పలు చోట్ల ఎముకలు విరిగాయి. మరో నలుగురు ప్రాథమిక చికిత్స అనంతరం డిశ్చార్జై బంధువుల వెంట వెళ్లిపోయారు. రాష్ట్రం నుంచి ప్రత్యేక బృందాలు: షిర్డీ బస్సు ప్రమాద ఘటనలో సహాయ చర్యలు చేపట్టేందుకు మెదక్ జిల్లా నుంచి రెవెన్యూ, పోలీసు, వైద్య బృందాలు జల్‌కోట్ వెళ్లాయి. శనివారం ఉదయం 7 గంటల ప్రాంతంలో సీఎం కిరణ్‌కుమార్‌రెడ్డి మెదక్ జిల్లా కలెక్టర్ సురేశ్‌కుమార్‌తో మాట్లాడి, సహాయ చర్యల బాధ్యత అప్పగించారు. క్షతగాత్రులను ఇప్పటికిప్పుడు హైదరాబాద్ తరలించే పరిస్థితి లేకపోవడంతో వారి పరిస్థితి మెరుగయ్యేదాకా వైద్య, రెవెన్యూ బృందాలను షోలాపూర్‌లోనే ఉండాల్సిందిగా ఆదేశించినట్టు సురేశ్‌కుమార్ ‘న్యూస్‌లైన్’కు వెల్లడించారు. స్థానిక పోలీసులు మృతుల బంగారు ఆభరణాలు, వాచీలు, సెల్‌ఫోన్లు తదితరాలను భద్రపరిచారు. వాటన్నిటినీ హైదరాబాద్‌కు తరలించేందుకు జహీరాబాద్ డిపో నుంచి ఆర్టీసీ రెండు బస్సులను పంపింది. మృతులు-క్షతగాత్రుల వివరాలు రోడ్డు ప్రమాదంలో మృతి చెందిన వారి వివరాలను హైదరాబాద్ ఆర్డీవో హరీష్ ప్రకటించారు. ఆయన వెల్లడించిన 20 మంది మృతుల వివరాలు... సింగిరెడ్డి(20), మోహన్‌రావు(30-రంగారెడ్డి జిల్లా), డి.జగన్నాథ్ పైడి (23-హైదరాబాద్), పి.శ్రీకాంత్ (హబ్సిగూడ-తండ్రి పేరు నేతాజీ), విక్రమ్(కూకట్‌పల్లి- తండ్రి ఎం.సుదర్శన్), గౌతమ్‌కిషన్‌లాల్ బండారి(హైదరాబాద్), దీపికా కృష్ణయ్య, ప్రఫుల్ సురేశ్, డాక్టర్ పి.సుశీల్‌కుమార్(34-హైదరాబాద్), కె.రామారావు వెంకటాద్రి (55), బంగారురాజు కిషోర్‌కుమార్, ఉమా మహేశ్వరి (21-విశాఖ), సాయి సుష్మ (24-రాజుపాలెం, కడప), ఎం.సురేశ్ (29-హైదరాబాద్), కె.వెంకటేశ్వరరావు (హైదరాబాద్), కె.అనిత (హైదరాబాద్), వెంకటేశ్వర్లు (55-తండ్రి వెంకయ్య), ఆదిత్య (తండ్రి వెంకటేశ్వర్లు), పి.దీప్తి (విజయనగరం-తండ్రి జగదీష్ పైడే), సరోజిని (55-సికింద్రాబాద్) మరికొందరు మృతుల వివరాలు: దివ్య (విశాఖపట్టణం), తేజస్విని (45-రాజుపాలెం, కడప), సీనా కేశవరెడ్డి (16-హైదరాబాద్), సంతోష్ గుప్తా (25-హైదరాబాద్), ఆదెమ్మ (50-గుంటూరు), కిష్టయ్య (50-గుంటూరు), సావిత్రమ్మ (46-గుంటూరు), బి.నరేశ్, కృష్ణ సాహిత్య (విజయనగరం) క్షతగాత్రులు: కృష్ణ తులసి, ఇందూ వెంకటేశ్వర్, జోసఫ్ (కృష్ణా జిల్లా), పూజిత (విశాఖపట్నం), ఎస్.అశోక్‌కుమార్ (హర్యానా), దిప్తీ విశాల (గుంటూరు), ఎన్.రాధిక (గుంటూరు), రజత్ వీరేంద్ర (ఢిల్లీ), వీరన్ ఉపేంద్ర (ఖమ్మం), డి.యాదగిరి, షీలా ప్రవీణ, సంపత్ శ్యామ్ (విశాఖపట్నం), ఎ.ఎస్.ప్రవీణ్, కిరణ్‌కుమార్ (శ్రీకాకుళం), జ్యోతి సుశీల్‌కుమార్, (హైదరాబాద్), శేషుబాబు. హెల్ప్‌లైన్ సెంటర్ల ఏర్పాటు హైదరాబాద్, న్యూస్‌లైన్: మహారాష్ట్రలో జరిగిన రోడ్డు ప్రమాదంలో మృతులు, క్షతగాత్రుల వివరాల కోసం శనివారం హైదరాబాద్ కలెక్టరేట్ కార్యాలయంలో హెల్ప్‌లైన్ సెంటర్లను ఏర్పాటు చేశారు. ప్రమాదంలో మృతి చెందిన, గాయపడిన వారి వివరాలను వారి కుటుంబ సభ్యులు, బంధువులకు అందించేందుకు జిల్లా కలెక్టర్ నటరాజన్ గుల్జార్ యుద్ధప్రాతిపదికన హెల్ప్‌లైన్ సెంటర్లను ఏర్పాటు చేయాలని ఆదేశించారు. హెల్ప్‌లైన్ ఫోన్ నంబర్లు: 9440815861 / 040-23204833 అతివేగం, ఇరుకు వంతెన వల్లే.. అతి వేగమే ప్రమాదానికి కారణమని ప్రాథమికంగా తేలినట్టు ఉస్మానాబాద్ జిల్లా ఎస్పీ దత్తాత్రేయ కరాడే ‘న్యూస్‌లైన్’కు తెలిపారు. ఈ రోడ్డుపై మునుపెన్నడూ ఇంతటి ప్రాణనష్టం జరగలేదన్నారు. ఇరుకైన వంతెన కూడా ప్రమాదానికి కారణమేనని ఘటనా స్థలాన్ని పరిశీలిస్తే తెలుస్తోంది. ఎదురుగా వస్తున్న వాహనాన్ని తప్పించే ప్రయత్నంలో బస్సు లోయలో పడ్డట్టు పోలీసులు భావిస్తున్నారు. ఇరుకైన ఈ వంతెనకు రక్షణ గోడ కూడా లేదు. దాంతో అతివేగంగా వస్తున్న వోల్వో బస్సు, ఇనుప కడ్డీలతో కూడిన నామమాత్రపు రెయిలింగ్‌ను ఢీకొట్టి లోయలోకి దూసుకెళ్లింది. విజయమ్మ దిగ్భ్రాంతి హైదరాబాద్, న్యూస్‌లైన్: మహారాష్ట్ర నల్‌దుర్గ్ వద్ద చోటుచేసుకున్న బస్సు ప్రమాదంలో రాష్ట్రవాసులు మరణించడంపై వైఎస్సార్ కాంగ్రెస్ గౌరవాధ్యక్షురాలు విజయమ్మ దిగ్భ్రాంతి వ్యక్తం చేశారు. మృతుల కుటుంబీకులకు ప్రగాఢ సానుభూతిని తెలియజేశారు. విశాఖపట్నం, శ్రీకాకుళం జిల్లా పర్యటనలో ఉన్న ఆమె విషయం తెలుసుకొని తీవ్ర విచారం వ్యక్తం చేశారు. గాయపడిన వారికి ప్రభుత్వం వెంటనే మంచి వైద్యం అందజేయాలని ఒక ప్రకటనలో ఆమె కోరారు. చంద్రబాబు విచారం..: బస్సు ప్రమాదం పట్ల టీడీపీ అధ్యక్షుడు చంద్రబాబు విచారం వ్యక్తం చేశారు. గాయపడిన వారికి ప్రభుత్వం మెరుగైన వైద్యం అందించడంతో పాటు మహారాష్ట్రకు ప్రత్యేక బృందాన్ని పంపించాలని శనివారం ఒక ప్రకటనలో కోరారు. బస్సు యాజమాన్యానికి నోటీసులు! హైదరాబాద్, న్యూస్‌లైన్: హైదరాబాద్ నుంచి షిర్డీ వెళుతూ ప్రమాదానికి గురైన బస్సు యాజమాన్యానికి నోటీసులు జారీచేయాలని రవాణాశాఖ నిర్ణయించింది. బెంగళూరుకు చెందిన కాళేశ్వర్ ట్రావెల్స్ భాగస్వామి సీహెచ్ రమేశ్ పేరిట ఈ బస్సు రిజిష్టర్ (కేఎ 01డీ 0245) అయ్యింది. అయితే, బస్సు పొరుగు రాష్ట్రానిది కావడం.. ప్రమాదం మరో రాష్ర్టంలో జరగడంతో కేవలం నోటీసులతో సరిపెట్టుకోవాలని భావిస్తోంది. మన రాష్ట్ర ప్రయాణికులను తరలించడంలో భద్రతా ప్రమాణాలు పాటించకపోవడంపై వివరణ కోరుతూ ఈ మేరకు నోటీసులు ఇవ్వాలని యోచిస్తోంది.

రోమాంచిత సాహసం - నయాగరా జలపాతంపై రోప్‌వాక్

ఒంటారియో(కెనడా) : ఉత్తర అమెరికా, కెనడాలను విభజించే అతిపెద్ద జలపాతం నయాగరాను అత్యంత సునాయాసంగా దాటి రికార్డు సృష్టించాడు యువ అమెరికన్ వాలెండా. చూసేందుకే ఒళ్ళు జలదరించే ఈ జలపాతంపై వాలెండా నడుస్తున్న దృశ్యాన్ని ఇటు అమెరికా, అటు కెనడా పౌరులు ఊపిరిబిగబట్టి మరీ వీక్షించడం విశేషం. వివరాలు.. అమెరికాకు చెందిన నిక్ వాలెండాకు సాహసాలు చేయడమంటే ఎంతో సరదా. సాధారణ పౌరుల్లా బతికేయకుండా ఏదో ఒక ప్రత్యేకతతో జీవించాలని ఉవ్విళ్ళూరే ఈ 33 ఏళ్ళ యువకుడు ఇప్పటి వరకు ఎవరూ చేయని సాహసాన్ని చేయాలని నిర్ణయించుకున్నాడు. అమెరికా, కెనడాను విభజించే నయాగరా జలపాతంపై ఇటు నుంచి అటు రోప్ ద్వారా నడిస్తే ఎలాగుంటుందని ఆలోచించాడు. ఎంతో లోతుగా ఉండి, దాదాపు 1,800 అడుగుల వెడల్పు ఉన్న జలపాతంపై నడిచివెళ్ళడాన్ని కొందరు స్నేహితులు, కుటుంబ సభ్యులు తొలుత అంగీకరించలేదు. అయితే, వాలెండా పట్టుదలను చూసి వారు మౌనం వహించారు. మొదట అమెరికా వైపు ఉన్న జలపాతం అంచు నుంచి ప్రారంభించి, కెనడా వైపు ఉన్న అంచుపై నడక పూర్తిచేశాడు. వాలెండా సాహసాన్ని వీక్షించేందుకు అమెరికా, కెనడా పౌరులు వేల సంఖ్యలో జలపాతం వద్దకు చేరుకుని విజేతకు జేజేలు పలికారు. మొత్తం 1,800 అడుగుల దూరాన్ని వాలెండా కేవలం 30 నిమిషాల్లో నడిచి రికార్డు సృష్టించాడు. రోప్‌పై నడుస్తున్న సమయంలో బ్యాలెన్స్ కోసం ఓ పొడవాటి కర్రను మాత్రమే వినియోగించాడు. నయాగరా జలపాతంపై నడిచిన మొట్టమొదటి వ్యక్తిగా వాలెండా రికార్డు సొంతం చేసుకున్నాడు. ఈ సందర్భంగా వాలెండా మాట్లాడుతూ, ‘నడుస్తున్నంత సేపూ మేఘాల్లో తేలినట్టు అనిపించింది. భయం భయం అనుకుంటే ఏదీ సాధించలేం. అసాధ్యం అనుకున్నా ఏదీ చేయలేం’ అని అన్నాడు.

Once-again-Balakrishna-and-Bellamkonda-suresh

Posted June 17th, 2012, 12:00 AM IST

How-about-Dil-Raju-movie-collections

Posted June 17th, 2012, 08:00 AM IST